«Идел» журналы чыга башлауга - 35 ел»

О выставке

«Идел» яшьләр журналының беренче саны 1989 елның июль аенда чыга. Тәүге санның тышлыгында ук төп дүрт тема-юнәлеш билгеләнә — әдәбият, мәдәният, яшьләр, заман. Сәгыйть Сүнчәләйнең «Сөй гомерне, сөй халыкны, сөй халыкның дөньясын!» дигән юллары журналның төп шигаренә әверелә. Бүгенге көнгә кадәр тема-юнәлешләр дә, шигарь дә үзгәрми саклана. Журнал чыга башлаган вакыттан ук ике телдә нәшер ителә. «Идел» журналының беренче баш мөхәррире – Римзил Вәлиев. Урысча чыгарылыш буенча урынбасары — Ә.Мушинский, татарчасында — ул чакта әдәбият институтында укып йөргән Ф.Зөлкарнәй.  Журнал чыга башлаганчы ярты еллар алдан масштаблы реклама эшчәнлеге җәелдерелә, нәтиҗәдә “Идел” беренче язылу кампаниясендә үк дистә меңләгән тираж җыя ала. Ә тагын бер-ике елдан язылучылар саны 120 меңгә җитә.